AUTEUR ANONYME (?-?) Comme pamphille dit que par le conseil de venus il ne luy est point

Comme pamphille dit que par le conseil de venus il ne luy est point
amendé Ains que sa douleur est aussi grande ou plus que devant.


Incolumis leviter egro solatia prebet
Nec minus infirmus sentit adesse malum

On dit que ung sain legierement
Au malade donne soulas
Bien est legiere voirement
L'ayde que me donne en mon cas
Venus: car je me sens plus las
Ou autant que devant estoye
Je puys bien dire dieux helas
Je croy que jamais n'auray joye

Consilio veneris michi non dolor alleviatur
Sed meus in tristi pectore versat amor.

Le conseil de dame venus
Ne m'a point la douleur ostée
De qui mes membres sont tenus
Ains croy qu'elle soit augmentée
Et pour l'amour de galathée
Que j'ay cloz dedens ma poitrine
Incessantement tourmentée
Du feu d'amour qui point ne fine

Hactenus auxilii mihi spes fuit omnia nulla
Spes modo discessit et manet ipse dolor

Maintenant esperance avoye
En venus que totallement
Par elle conforté seroye
Mais je ne apperçoy nullement
Que j'aye aulcun allegement
Esperance s'est separée
De moy, et m'est entierement
Toute la douleur demourée

Non miser evadam me nauta reliquit in undis
Et portum quero nec reperire queo.

Point ne esvaderay ce dangier
Car le marinier me delaisse
Es eaux ou je ne puis nagier
C'est venus la haulte déesse
Ou je cuydoye avoir adresse
En ma douleur et reconfort
Mais il fault bien que je congnoisse
Que j'ay cherchié sans trouver port

Sed modo quid faciam mea spes modo spectat ad illam
Illi me noviter convenit ire loqui

Maintenant que feray je doncques
Plus d'esperance n'ay en elle
Plus esbahy que ne fuz oncques
Je suis: pour neant je l'appelle
Aler me fault parler a celle
Pour qui ceste douleur me tient
Helas la gracieuse et belle
Voycy ou vers moy elle vient