AUTEUR ANONYME (?-?) Comme la vieille demande a pamphille pour quoy c'est pour donner a entendre

Comme la vieille demande a pamphille pour quoy c'est pour donner a
entendre qu'elle n'en sçait point la cause.


Dic nuper ignoti seriem michi pamphile facti
Hujus origo mali non sit operta mihi

Pamphille je te pry dy moy
De ce fait icy incongneu
Comme peut il estre advenu
De qui et la raison pour quoy
Il me le fault sçavoir de toy
Si te pry en propoz final
Que la naissance de ce mal
Qui la tient me soit descouverte
Tu sçaiz que j'ay le cueur loyal
Dy moy le motif principal
De ceste douleur si couverte




Pamphille respont a la vieille et dit qu'il n'est ja mestier que plus
elle en saiche.


Arguor e nimia si scires ordine culpa
Est que michi meritis durior ira meis

D'une culpe argué je suys
Tres grande se tu le sçavoyes
Tant courroucé que plus ne puis
Je pers quasi toutes mes joyes
Tourmenté suys en mille voyes
De voir ceste femme plourer
En cest estat et souspirer
Car l'ire qu'el a tresdespite
Est a justement comparer
Trop plus grande que le merite

Sed decet archanum celari semper amantum
Nam dixisse nocet cum dolor omnis abest.

Mais touteffois au vray parler
Secret d'amans se doit celler
Et soit devant ou soit derriere
Il ne se doit point reveller
A personne ne ventiller
Tant soit personne familiere
Car quant la douleur est allée
S'on a la chose revellée
Il nuyst et si est dangereux
Si doit tousjours estre cellée
La conduite des amoureux

Tantum lenire rixas tibi convenit ire
Quod superest inter nos decet esse duos

Suffise toy tant seullement
La noise appaiser doulcement
Et ne te mesle du debat
Entre nous deux l'appointement
Se fera tout soudainement
Ce n'est que maniere d'esbat
Quelque chose que amoureux noysent
Ce n'est rien tousjours se rapaisent
De leur estat il se fault taire
Ce n'est que demie paix a faire
Que d'amis courroucez ensemble
Se l'une heure les fait retraire
A l'esquart l'autre les rassemble