AUTEUR ANONYME (?-?) Le Songe Doré De La Pucelle.(15ème Siecle.)

Le Songe Doré De La Pucelle. (Entre 1488 et 1492)

Par Anonyme.


La Pucelle.

Cy commence le songe doré de la pucelle.
A l'eure du songe doré
Lors que l'aube du jour se lieve
Qu'on se treuve trop essoré
Souvant d'une nuyt assés griefve
M'endormis pour la faire briefve
Trestout le premier jour de may
En jennesse n'a point d'esmay

Sitost que je fus endormie
Deux personnages vis venir
Qui me dirent. Ma belle amye
Il te fault autre devenir
Reprens ung nouveau souvenir
Car d'enfance tu es delivre
L'aage enseigne com on doit vivre

Tu es moult belle fresche et ferme
Et de tous membres avenue
Et dist l'une je le tafferme
Autant qu'autre dessoubz la nue
Soit dessoubz robe ou corps nue
Blanche. souefve. dure et refaite
Chose de saison est parfaite

Jamais plusgaye ne te tiens
Plus drue ne en meilleur point
Beau visage. gent corps te tiens
Qui font ores leur premier point
Du surplus dire ne fault point
Car on te tient par ung chief d'euvre
Bel est l'ouvrage qui mieulx euvre

Tu as assés d'entendement
Et sens pour fille de jenne aage
Je ny voy point d'amendement
Ne querir autre personnage
Tu es nee de bon lignage
Comme puis avoir entendu
Bien qu'on ne congnoist est perdu

Se comme femme je fusse homme
Je te priasse pour ma dame
La singuliere c'est en somme
Qui oncques fut nee de femme
Car je t'asseure sur mon ame
Que tu es belle tout a droit
Qui a belle dame il a droit

La firent ung peu d'intervalle
Ces deux semblables que je vis
L'une monte l'autre devalle
Chascune assés bien se chevist
Et sur ma foy je vous plevis
Que dormis jusques a la lie
Bien dort qui n'a melencolie

Ainsi que personne qui songe
Me semble bien quant je m'avise
Des deux personnes de mon songe
Congnoistre selon leur devise
L'abit mesmes le me devise
En grosse lettre a peu de plait
Adés chose nouvelle plait

Je prins aux lettres exemplir
Ainsi que femme mal lisant
L'une apres l'autre recueillir
Pour veoir qu'elles alloyent disant
Et tant les alay avisant
Que de leurs noms je fis l'espreuve
Je croy qui bien charche bien treuve

Je trouvay que l'une avoit nom
Amours richement atournee
Comme dame de grant renom
A bien porter son atour nee
L'autre fut a part destournee
Ce fut honte qui s'esbaudit
Selon la personne l'abit

Amours me print a raisonner
Si fit puys honte a son tour
Moult bien me sceurent sermonner
Et me venir tout a l'entour
Elles menarent grant estour
Par parolles bien assaillans
Il n'est assault que de vaillans

Amour.
C'est amours qui parle premiere
Ma jenne fille gente et tendre
Amours est tousjours coustumiere
De tout son temps a joye tendre
Pource vueilles moy bien entendre
De moy n'es pas encores quitte
Il fault que jennesse s'acquitte

Honte.
Adonc respond honte tout court
Ma belle amye non feras
Car ung si mauvais monde court
Certes que trop te mesferas
Sitost qu'amoureuse seras
Je te tiens pour toute esperdue
Femme sans honneur est perdue

Amour.
Honte qu'est de paour engendree
Avecq celle faulce vergoigne
Oncques ne fit bonne cendree
Mais tousjours est pleine de groigne
Faisant une mauvaise troigne
Pour faire son bec clacqueter
Vielles ne font que cacqueter

Honte.
Haa ma fille que feras tu
Se tu trois ceste male femme
Ton fait ne vaudra ung festu
Folle deviendras et infame
Pour dieu garde ta belle fame
Ne pers point ta virginité
Pucellage est grant dignité

Amour.
Se honte croys tu es affollee
Jamais ne vaudras ung oignon
Tu es a prendre ta volee
Pour avoir joye ou jamais non
Choisis quelque beau compaignon
Mais qu'il souffise a ta plaisance
Il n'est tresor que souffisance

Honte.
A croire conseil de legier
Et puys en prendre maladie
A grant peine peut aleger
Puys qu'il convient que je le die
Tantost aimer a l'estourdie
Ne seroit pas bonne accointance
Haster engendre repentence

Amour.
A jenne pucelle appartient
D'estre frisque joyeuse et gente
Et quant en ce point se maintient
C'est noblesse qui la regente
De ce ne doit estre indigente
Dance et vole com une aronde
On n'a que sa vie en ce monde

Honte.
Las avise se tu t'assers
Tu seras une esservellee
Teste levee com ung sers
De tout le monde ravallee
Soyes en maniere attellee
Tousiours simple et coye te tien
En pucelle n'a que maintien

Amour.
Aime ma fille car sans faille
Tu peux aimer secretement
En bien et honneur. ne te chaille
Prisee en seras haultement
Huchee en tout esbatement
En grans festes et en tournoys
Trop craindre ne vault ung tournois

Honte.
Craindre en jennesse se me semble
Est ung signe bien a priser
Et si doivent aller ensemble
Ou l'on se feroit mespriser
Cest enseignement je prins hier
Trestout ainsi que je le compte
Tout noble cueur doit craindre honte

Amour.
Est ce honte d'estre joyeuse
Ne de faire les gens valoir
Sans plus riens d'estre envieuse
Car du surplus ne peut chaloir
Quant on se met en nonchaloir
C'est trop fait de lasche courage
Tost ou tard l'esté fait aurage

Honte.
Faire valoir pour valoir moyns
Les autres ne seroit pas sens
Je te jure de mes deux mains
Tu es folle se tu l'assens
Monstree a milliers et a centz
Seras comme beste sauvage
Male est eau hors de rivage

Amour.
Veulx tu plus d'onneur ne d'avance
Que de veoir ces gentilz falotz
Courir chevaulx bondir la lance
Et espinguer saultz et galopz
Devant toy qui auras les loz
Que pour l'amour de toy le font
Noble cueur en joye se fond

Honte.
Veulx tu plus estre diffamee
Que d'avoir nom d'estre amoureuse
D'un qui te dit sa bien aimee
Toutesfoiz il ment maleureuse
Garde toy pouvre douleureuse
De toy bouter a tel azard
Busche verte pas a pas ard

Amour.
Recongnoys les biens que nature
T'a donné et si largement
Faite si belle creature
Que c'est ung grant enragement
Si que non au grant jugement
En rendras compte et reliqua
Il fault garder le rebeca

Honte.
Tant plus t'a nature formee
De toutes vertuz acomplie
Tant plus tu dois estre informee
Et de trestous grans biens remplie
Se ton cueur a mal faire plie
Ton compte ne sera pas bon
Qui volee a n'attende bon

Amour.
Se nulle n'eust aimé jamais
Je ne t'en voudroye semondre
Ne t'esmouvoir a cecy. mais
Les grandes t'en peuent respondre
Toutes aiment sans en escondre
Une tant soit haulte princesse
Quant vient l'esté le prim temps cesse

Honte.
Pluseurs foiz se sont consentues
Aucunes dames par amours
Qui puis s'en sont bien repentues
Et en ont fait maintes clamours
Mieulx te vault faire tes rimours
Que t'en repentir se dieu m'aide
A chose faite n'a remede

Amour.
Ne fut celle du roy arthus
Et medee et pollissaine
Et maintes pleines de vertus
Qui aimarent de teste saine
Pourtant ne soyez si haultaine
Que tu n'aimes qui t'aimera
Amer morcel trop amer a

Honte.
Qui liroit jusques a la fin
La fin n'en fut pas honnourable
Mais douleureuse a la parfin
Ainsi me soit dieu secourable
Pourtant n'y soyes favorable
D'exemple n'y fault ung ne deux
Amours d'une joye a cent deulz

Amour.
Narcisus qui ne voult aimer
Fut neyé dedens la fontaine
Par jugement qui fut amer
Des dieux. de ce suis je certaine
Je te demande en bonne estraine
Ne fut bien martyr cestuy la
Oncques n'eut joye qui n'aima

Honte.
Susanne fut de dieu amye
Qui ne voult aimer follement
Gardee fut d'estre perie
Pour garder honneur seulement
S'elle eut ung dur commencement
La fin fut bien victorieuse
Dieu craindre est vie glorieuse

Amour.
On peut bien aimer sans follie
Ne qu'il en vieigne deshonneur
Se villain penser le fol lie
Ja dieu ne luy soit pardonneur
Aime ma fille car donneur
Est qui par nature tresprent
Qui fait ce qu'il doit ne mesprent

Honte.
L'entree est doulce et attrapant
Car c'est miel de venin confit
Dont on n'est jamais attrayant
Sitost qu'on se sent desconfit
Non y entrer est du prouffit
A tout le sexe feminin
En la queue gist le venin

Amour.
Honte trop lourdement t'estrange
Il ny fault point tant destrivees
Celles qui font tant de l'estrange
Sont bien souvant les plus privees
Et quant elles sont desrivees
D'avoir trop tardé se repentent
Beaucoup de choses femmes temptent

Honte.
Sages sont celles qui se gardent
D'aller en lieu pour faire escoutes
Car si bien a point n'y regardent
Tost y seront jusques aux coutes
Ces parolles prens et escoutes
Ensuir telz esbatz n'est pas mocque
Tel flatte autruy qui puys s'en mocque

Amour.
Quant on treuve ung homme discret
On le peut aimer seurement
Mais qu'il soit loyal et secret
Pour bien aimer entierement
Ainsi garde on legierement
Sa plaisance si est frivolle
Fol est qui attent l'oysel qui vole

Honte.
Il n'est chose tant soit secrete
Qu'a la parfin on ne la sache
Tousjours n'est pas femme discrete
De bien savoir couvrir sa tache
Quant l'un boute et l'autre sache
Savoir le fault de quelque part
Amours a sa guise despart

Amour.
Helas m'amye ce n'est pas ce
Ne croyes pas cest ypocrite
Que feras tu de ta jennesse
Qu'est si belle et si bien escripte
La veulx tu perdre toute fritte
Sans faire ton loyal devoir
On peut maintesfoiz trop devoir

Honte.
Devoir trop ou peu qui emprunte
Sur son honneur blasme ou reproche
Ja n'acquittera ceste emprunte
Celle qui soymesmes reproche
Plus s'esloigne et moyns s'aproche
D'estre par tout bien renommee
Jamais ne meurt la renommee

Amour.
Dont vient renom fors que des preux
Dont viennent les preux que des dames
Par amours qui se sert entre eulx
Qui font esprouver ses heaulmes
Si que ung tout seul vault aux royaulmes (???)
Pour une a qui servant se clame
Prouesse double a cueur qui aime

Honte.
Ma seur a jouer sans nul fatras
Seroit bonne amour et loyale
Mais apres le cop du matras
Au long aller n'est pas fiable
Car humanité cordiale
S'y fourre trop a l'aventure
A peine oublie on sa nature

Amour.
Se nature se veult forfaire
Dame raison est par dessus
Pour la corriger et retraire
Affin qu'il n'en soit pas deceuz
Pource peut on et jus et sus
Qui resister veult si m'aist dieux
Raison domine soubz les cieulx

Honte.
Qui seroit seur de la raison
On pourroit tout aventurer
Mais veoir bruler autruy maison
Fait pour la sienne procurer
Que feu n'y puisse pasturer
Et qu'elle ne soit desbastie
Sage par autruy se chastie

Amour.
Chascun scet bien ce n'est pas bourde
Que pucelle qui n'a amy
Toute sa vie est sotte et lourde
Et ne scet ne bien ne demy
Et tousjours a l'ueil endormy
Sans peu de contenance avoir
C'est belle chose que savoir

Honte.
Savoir pucelle sobrement
Doit sans vouloir estre suttile
C'est sa nature proprement
Ou faillir pourroit cop et quille
Tout ne vault pas une coquille
Quant de languager s'entremet
Qui trop parle mensonge y met

Amour.
Trop de bien savoir ne peut on
Ne de mal mais que l'on n'en use
Qui riens ne scet c'est ung mouton
Une brebis ou une buse
Chascune foys on se rabuse
Quant on ne scet son entregent
Ung mot est bel quant il est gent

Honte.
Parler a point quant il est heure
N'est pas vice je le confesse
Combien que femme s'en esmeuve
Si doit de parler faire cesse
Chascune n'est mye maistresse
Qu'en elle on ne treuve a redire
Mieulx se vault taire que mal dire

Amour.
On dira ce que l'on voudra
Mais s'en pucelle n'a du bien
Nully d'aimer ne l'assaudra
Pardieu cela savez vous bien
Pour s'amour l'aime l'on. combien
Que d'autrement elle soit belle
Femme ne doit estre rebelle

Honte.
Rebelle n'est qui se defend
Pour son honneur entregarder
Soymesmes courrouce et offend
Celle qui ne se scet garder
Tant se peut on bien mesgarder
Que le chat se prent au fromage
Sens est de fouyr son dommage

Amour.
Il n'est ma seur mye besoing
Que toutes celles qui bien aiment
Soyent gettees pres ne loing
S'aucuns pour dames les reclament
Trop y en auroit qui se clament
Bonnes et vaillans preude femmes
Gens mesdisans sont trop infames

Honte.
Dangier. envie. malebouche
Sont tout par tout faulx helequins
Garde que leur fait ne te touche
Car ilz valent pys que coquins
Pys font que donner les boucquins
Pource prens garde a ton affaire
Nully n'est blasmé de bien faire

Amour.
Peché seroit de toy blasmer
Et te mettre villain chappel
Se les gens te veulent aimer
Doys tu de ce faire ung appel
Non non. se j'estoy en ta pel
La voudroye je condescendre
Amours fit dieu du ciel descendre

Honte.
L'amour de dieu et la mondaine
Ne se mettent point en ung compte
L'une est bonne l'autre est fredaine
L'une paye l'autre mesconte
Ceulx qui veulent narrer ce compte
Se coeuvrent bien d'un sac moillé
Beau drap ne doit estre soillé

Amour.
C'est bonne amour que bien vouloir
A ung autre com a soymesmes
Et ce ung galant a ce vouloir
De tant qu'il l'a te met a mesmes
Ne luy dois tu vouloir ce mesmes
Ainsi dois tu ton honneur sauve
Bonne femme quant veult se sauve

Honte.
Qui veult eschever le peril
Il doit fouyr l'occasion
Pucelle nette craint venin
Toute ordure et corrupcion
Affin que par communion
Ne se puist trouver entachee
Blanche couleur est tost tachee

Amour.
Je ne sauroye tant prescher
Mais aime bien se tu m'en croys
Vers moy tu te doys adresser
Par le dieu qui pend en la croix
Ja bien n'auras se ne me croys
Ne plaisance en jour de ta vie
Aimer autruy n'est pas envie

Honte.
Comment tes secretz vergoigneux
Pourras a honneur descouvrir
Qui doivent estre si soigneux
D'estre bien gardez de courir
Tu ne doys jamais l'oeil ouvrir
Pour regarder ung homme en chere
Honneur est doreure bien chere

Amour.
Homme et femme sont tout ung
D'une mesmes masse creez
Pource doivent estre commun
Sans honte en tous lieux asseurez
Deux sont en une chair entrez
S'ilz s'entraiment c'est raisonnable
Toute chose aime son semblable

Honte.
Ma seur tant que seras honteuse
Et auras crainte de faillir
Jamais ne seras souffraiteuse
Biens ne te pourront defaillir
Ne te seuffre trop assaillir
De ces joliz fringuans verboys
Bon fait avoir ung oeil aux boiz

Amour.
Fille tu es a ta franchise
Fais ce que bon te semblera
Tu as temps de vivre a ta guise
Espoir riens on ne t'emblera
Ton fait d'autres ressemblera
Sur le col la bride t'en laisse
Jenne chien envis va en laisse

Honte.
Honte auras devant tes yeulx
Quant tu seras d'amours esprise
Le monde t'en aimera mieulx
Et n'en seras de dieu reprise
Conduys sagement ton emprise
Sur le col la bride t'en laisse
Jenne chien envis va en laisse






La Pucelle.
Adonc les prins a mercier
De ce que me voudrent aprendre
Et dis pour les pacifier
Que me garderay de mesprendre
Lors me vint le grant jour surprendre
Quant plus riens ne vis je m'esveille
Maintz songes plaisent a merveille

Et quant je fus bien esveillee
Je pensay a ce que j'avoye
Beaucoup brugé a la veillee
En moy pourmenant par la voye
Et ainsi comme je savoye
Recorday tout deux ou troys foiz
Songes sont vraiz aucunes foiz

J'alay d'aventure trouver
Ung qui savoit lire et escrire
Si m'essayay de l'esprouver
Et si luy dis. Amy beau sire
Voulez vous point mon songe escrire
Que j'ay songé presentement
Maint songe donne alegement

Je luy recitay mot a mot
Ce que dessus est contenu
Selon ce qu'esté me dit ot
Lequel l'a tresbien entendu
Se j'ay failly ne soit tenu
A mespris je vous en supplie
A peine est personne accomplie

Et s'il y a riens tant soit peu
Qui soit digne d'estre en memoire
Et dont on doive estre repeu
On fera bien s'on le veult croire
Et qui voudra de cest ystoire
Que le nom point je ne vous celle
C'est le songe d'une pucelle







Cy finist le songe doré autrement appellé
d'une pucelle.

Ballade faite a la rescription de sa dame.
Or voy je bien que mon dueil renouvelle
Et que ma joye prent son definement
Quant il me fault partir de la tresbelle
Qui a mon cueur a son commandement
Si ne say pas la maniere comment
Vivre puisse longuement sans mourir
Puys qu'il me fault de ma dame partir

Car tant mon cueur dedens moy estincelle
Et jour et nuyt fremist si asprement
Qu'en moy paour par dangier si se reveille
Et desespoir qui d'un consentement
Sont allez pour me faire torment
Si ne voy pas qui me puist garentir
Puys qu'il me fault de ma dame partir

Mort vien a moy si me prens je t'appelle
Car j'aime mieulx mourir prochainement
Que recevoir si tresmale nouvelle
Com de m'amour faire deppartement
Mais sans sejour j'ay le definement
Destrains mon cueur et le vien assaillir
Puys qu'il me fault de ma dame partir

Prince je vous supply tres humblement
Que me vueillez donner alegement
Car grief douleur fait mon cueur espartir
Puys qu'il me fault de ma dame partir.