Jean Auvray (ca. 1580-ca. 1630) Paralelelles de lune avec femme

PARALELLES DE LUNE AVEC FEMME

La lune et la femme legere,
Ne different pas de beaucoup,
Si l' une est prompte en sa carriere,
L' autre à bien tost frappé son coup.
La lune seroit tousjours noire
Si le soleil ne la baisoit,
Et la femme seroit sans gloire
Si l' homme ne la carressoit.
Sur les eaux la lune brunette


Estend tout son gouvernement,
La femme regit la brayette
Qui a beaucoup de moüillement.
Pour la nuict la lune est creée,
C' est la nuit que son flambeau luit,
Et la femme qui nous recrée
N' est rien faite que pour la nuict.
Si l' on dit que la lune est celle,
Qui preside aux enchantemens,
La femme aussi nous ensorcelle
De ses charmeurs blandissements.
Souvent la lune entre en furie
Jalouse des amours des dieux,
Et la femme par jalousie,
Trouble l' air, la terre, et les cieux.
La lune renverse cruelle
L' esprit leger et vacilant,
Mais il n' est si ferme cervelle
Que la femme n' aille troublant.
Il est bien vray qu' en contre-eschange
Ces deux ne se suivent tousjours,
Car tous les mois la lune change,
La femme change tous les jours.


La pleine lune enfle les sources
Et les moüelles des os creux:
La femme des-enfle nos bources,
Et vide nos os moüelleux.
La lune fidelle n' estime
Qu' Endimion son bel amant,
Mais la femme n' est qu' un abisme
Qui n' a point d' assouvissement.
Si la lune Acteon transforme
En cerf, pour avoir veu son cu,
Il n' y à homme (ô cas enorme)
Que femme ne change en cocu.
Bref, ce qui plante plus de bornes
Ce qui moins les fait rapporter,
C' est que la lune porte cornes:
Et la femme les fait porter.