Charles Coypeau d'Assoucy (1605-1677) Bataille de Rocroy

BATAILLE DE ROCROY

Svperbe demon de la guerre,
Effroyable dieu des combats,
Qui tonnez par tout icy bas,
Et depeuplez toute la terre:
Redoutable victorieux
Conte moy les faits glorieux
De cette celebre journée,
Où l'illustre sang de nos roys
Assura la France estonnée,
Et mit l'espagnol aux abois.

Et toy deesse accoustumée
À respandre le sang humain,
Preste moy ta sanglante main
Pour me conduire dans l'armée;
Monstre moy ce jeune soleil
Qui d'un courage sans pareil
Va reduire l'Ibere en poudre,
Que jele peigne dans mes vers
Ainsi que le dieu de la foudre,
Armé de flammes et d'esclairs.
Mais quel trouble se fait entendre,
Meslé de terreur et d'effroy;
Sus mon ame r'assure toy
Peux-tu craindre auec Alexandre:
R'assure mes pas et mon coeur,
Marche à l'ombre de sa valeur
Pour voir la sanglante partie,
Où ce prince nous doit venger
De la barbare antipathie,
Qu'a pour nous le fier estranger.
Deja l'aurore est en campagne,
L'estoille cedde à son retour,
Le prince n'attend que le jour
Pour mesler la France à l'Espagne,
Le camp brille de toutes parts,
De feux, de fers, et d'estendards,
Bellone paroist en furie,
Les cheuaux foulent les sillons,
Et la terre gemit et crie
Dessous les pieds des bataillons.