AUTEUR ANONYME (?-?) Comme la vieille respont a ce que gallathée se excusoit sus la commune

Comme la vieille respont a ce que gallathée se excusoit sus la commune
renommée et sentit alors la vieille qu'elle estoit vaincue.


Rebus in hiis major minus est infamia vero.
Sed prestat verum rumor et ipse cadet.

O belle qu'esse que tu dis
Je m'esbahyz que dire l'oses
As tu doubte des communs dictz
Qui sont si tres petites choses
Tu me diz icy et exposes
Que par sus autres choses toutes
Renommée commune doubtes
Dont pourroit venir infamie
Considere ma doulce amie
Que c'est tout que la verité
Il est vray que communité
Pour peu de chose son bruyt leve
Mais ce n'est que simplicité
D'y penser et fatuité
Car tel rumeur chiet et est brefve.

Murmura rumoris curas que levabo timoris
Vos vestros que rocos calliditate tegam

Pour cella ne dois faire fainte
Car de la rumeur les murmures
Leveray et toutes les cures
Desquelles tu dis avoir crainte
Tu voys que je sçay chose mainte
Ne te chaille je leveray
Bon nom de vous et couvriray
Vous et voz jeux par façon telle
De cautelle que je feray
Que jamais n'en sera nouvelle

Nam veneris mores cognoscimus secundus artes.
Et sic tuta modo res erit ingenio

Tu ne te dois point abuser
A faire ces vaines doubtances
Car je congnois pour excuser
Faiz d'amours et jeunes enfances
Tu sçaiz que j'ay les congnoissances
Et si ont celles de mon aage
De venus sçavoir son usaige
Ses ars meurs et conditions
Pourtant oste suspections
Et te confie seullement
En nostre engin croy fermement
Que ce sera chose cellée
Et gouvernée saigement
Sans pouoir estre revellée.

Illum cum videam michi consule quid sibi dicam
Quod michi tu dices tutus ipsa loquaris

Conseille moy ce que tu veulx
Que je dye a ton amoureux
Pamphille mais que je le voye
Et s'il y a entre vous deux
Aucune amour, car tu luy peuz
Donner ou desconfort ou joye
Mais que ton oppinion aye
Plus seurement je parleray
De ce pour quoy je suis envoye
Pour tant dy moy que je diray