CHARLES D'ORLÉANS (1394–1465) CHANCON II

CHANCON.


Dieu vous envoye pascience,
Gentil conte Cleremondois,
Vous congnoissez, à ceste foiz,
Qu'est d'amoureuse penitence;
Puisqu'estes hors de la presence,
De celle que bien je congnois.
Dieu vous, etc.
Gentil conte, etc.

Vouer vous povez aliance
A la riche, comme je crois,
Ne vous trouverez de ce mois,
Las! trop estes loing d'alegance.
Dieu vous, etc.

CHANCON.

Sauves toutes bonnes raisons,
Mieulx vault mentir, pour paix avoir,
Qu'estre batu, pour dire voir;
Pour ce, mon cueur, ainsi faisons.
Riens ne perdons, se nous taisons,
Et se jouons au plus savoir.
Sauves toutes, etc.
Mieulx vault, etc.

Parler boute feu en maisons,
Et destruit paix, ce riche avoir;
On aprent à taire et à veoir,
Selon les temps et les saisons.
Sauves toutes, etc.

CHANCON.

Il souffist bien que je le sache,
Sans en enquerir plus avant;
Car se tout aloye disant,
On vous pourrait bien dire actache.
Nul de la langue ne m'arrache
Ce qu'en mon cueur je voys pensant.
Il souffist, etc.
Sans en, etc.

Ainsi qu'en blanc pert noire tache,
Vostre fait est si apparant,
Que m'y trouve trop congnoissant;
Qui est descouvert, mal se cache.
Il souffist, etc.

CHANCON.

Ce n'est riens qui ne puist estre,
On voit de plus grans merveilles,
Que de baster aux corneilles
Les mariz, et l'erbe pestre.
Car de jouer tours de maistre,
Femmes sont les nompareilles.
Ce n'est riens, etc.
On voit, etc.

Tant aux huis, comme aux fenestres,
En champs, jardins, ou en trailles,
Par tout ont yeulx et oreilles,
Soit à dextre, ou a senestre.
Ce n'est riens, etc.

CHANCON.

Vous estes paié pour ce jour,
Puis qu'avez eu ung doulx regart;
Devant ung ancien regnart,
Tost est apparceu ung tel tour;
Quant on a esté à sejour,
Ce sont les gaiges de musart.
Vous estes, etc.
Puis qu'avez, etc.

Il souffist pour vostre labour,
Et s'apres on vous sert de lart,
Prenez en gré, maistre coquart,
Ce n'est qu'un restraintif d'amour.
Vous estes, etc.

CHANCON.

Faictes pour moy com j'ay pour vous,
Retenez moy, par dessus tous,
Amy tout seul, tres belle Dame,
Je vous jure sur Dieu, sur m'ame,
Ne vueil servir autre que vous.
Faictes pour moy, etc.

Guerrissez moy du mal d'Amours,
Et me donnez du bien de vous;
Reconfort tel plus ne m'en chaille,
Mon bien, m'amour, mon fin cueur doulx,
A vous me rens, à vous suis tous.
Faictes pour moy, etc.

Je vous ayme plus que autre femme,
N'autre que vous n'aura la garde,
Helas! de moy qui suy à vous.
Faictes pour moy, etc.

CHANCON.

Faire ne puis joyeulx semblant,
Reconfort n'ay, qui soit plaisant
A moy qui suis sans mon amy;
Il a long temps que ne vous vy,
Ne le verray, je ne scay quant?
Faire ne puis, etc.

Guerir ne puis du mal qu'ay tant,
Helas! emy! jusques à tant
Retournera celluy pourquoy.
Faire ne puis, etc.

Mon cueur si est si desplaisant,
Aussi bien doit estre dolent,
Il m'ayme tant! si foys je lui;
Ne le mectray point en oubli,
Et l'ameray en l'actendant.
Faire ne puis, etc.

CHANCON.

Et eussiez vous, Dangier, cent yeulx
Assis, et derriere, et devant,
Ja n'yrez si pres regardant,
Que vostre propos en soit mieulx;
Estre ne povez en tous lieux,
Vous prenez peine pour neant.
Et eussiez, etc.
Assis, etc.

Les faiz des amoureux sont tieux,
Tousjours vont en assoubtivant,
Jamais ne saurez faire tant
Qu'ilz ne vous trompent, se m'aist Dieux.
Et eussiez, etc.

CHANCON.

Patron vous fais de ma galée
Toute chargée de pensée,
Confort, en qui j'ay ma fiance,
Droit ou pais de Desirance,
Briefment puissiez faire arrivée;
Affin que, par vous, soit gardée
De la tempeste fortunée
Qui vient du vent de Desplaisance.
Patron, etc.

Au port de Bonne destinée
Deschargez tost, sans demourée,
La marchandise d'Esperance;
Et m'aportez quelque finance,
Pour paier ma joye empruntée.
Patron, etc.