Guillaume Colletet (1598-1659) Aux peres qui estoient aux lymbes. Sur le mesme sujet.

Aux peres qui estoient aux lymbes.
Sur le mesme sujet.


Sonnet.

Cessez vos pleurs, ô vous trouppe fidele,
Dieu fait cesser l' excez de son courroux ;
Puis qu' il fait voir combien il vous est doux,
Qu' il voye aussi l' ardeur de vostre zele.

Anne a conceu la divine pucelle,
Gage sacré du salut de vous tous ;
Ce jour doit estre autant heureux pour vous,
Comme il est saint et glorieux pour elle.

Dieu pour vous mettre en pleine liberté,
A mis sa mere en la captivité,
Du chaste flanc qui le porte et l' enserre ;

Consolez-vous, peres, en ces bas lieux ;
Pour elle ouvrant les portes de la terre,
Il va pour vous ouvrir celles des cieux.