Jean Auvray(1590-1633) AMOURETTES ODE

AMOURETTES ODE

Sur un desdaing.
Ma foy c' est trop de rigueurs
De mespris, et de langueurs,
Ma constance ne merite
Esprouvez tant de tourments.
Et ma faute est trop petite
Pour de si grands chastiments.

Qu' ay-je faict? Dictes le moy,
Vous ay-je manqué de foy?
Dictes tout haut mes offences,
Avant qu' arrest me donner:
Examinez mes deffences,
Premier que me condamner.

Lors qu' a mon retour, vos yeux
Firent d' un traict furieux
Les miens en larmes dissoudre,
Je dy (les voyant si clairs)
Amour sauve moy du foudre
Que presagent ces esclairs.

Mais cét enfant de Cypris,
Aveugle, et sourd à mes cris,
Exagere encor mon crime,
Faisant gloire le cruel
Qu' une innocente victime,
Expire sur son autel.

Madame qui est celuy
Qui soit exempt aujourd' huy
Des traicts de la médisance?
Un soupçon est-il si fort
Qu' il faille à mon innocence,
Se disposer à la mort?