Guillaume Colletet (1598-1659) À Monseigneur François De Harlay, archevesque De Roüen.

À Monseigneur François De Harlay, archevesque
De Roüen.

Sonnet.

Prelat, qui de bien loin surpasses l' esperance
Que chacun concevoit de ta rare vertu ;
Qui par tout tiens le vice à tes pieds abbatu,
Et triomphes par tout du monstre d' ignorance.

Lors que pour ton honneur, et le bien de la France,
Tu vas droict au chemin d' un siecle si tortu ;
Quelque exces de grandeur que les autres ont eu,
Il n' est rien de si grand que ta perseverance.

Que d' une bonne cause, il sort de bons effets !
Tout parfait tu produis des escrits tout parfaits ;
Te lisant, ou t' oyant, tousjours il nous faut taire.

Et quoy que nostre esprit presume assez de soy ;
Pour bien dire pourtant ce que tu sçais bien faire,
Il faudroit pouvoir dire, et faire comme toy.