Jean Auvray(1590-1633) AMOURETTES STANCES

AMOURETTES STANCES



Beaux yeux, temple d' amour, mysterieux oracles
Les tyrans ou les roys de nos affections,
S' ils n' aportoient qu' aux dieux à faire des miracles:
Estes-vous pas des dieux pleins de perfections?
Quel miracle plus grand que de reduire en cendre,
Les coeurs de mille amants d' un regard seulement,
Puis d' un autre regard tout soudain faire espandre
Une nouvelle vie aux cendres d' un amant.
Recevez donc beaux yeux pour victime propice
Mon coeur qu' amour consacre à vos divinitez,
Laissez sur vos autels fumer mon sacrifice,
Et tout nu à genoux adorer vos beautez.
Pardonnez ces eslans à mes brusques courages,
Le pardonner tousjours est le propre des dieux,
Puis les plus amoureux ne sont pas les plus sages,
Amour bande l' esprit aussi bien que les yeux.
Tout embrazé d' amour que sçaurois-je moins faire
Que d' implorer de vous remede à ce poizon?
Puis qu' aux playes d' amour n' agit point le contraire
Et qu' il faut de son mal tirer sa guarison.
Ainsi du scorpion la playe envenimée
Se guarit apliquant l' homicide animal,
Ainsi souloit jadis la lance de Pelée
Procurer le remede aussi bien que le mal.