Les tesmoins d' amour.
Sonnet 88.
L' amante de Narcis repeta le discours
Qui fit connoistre aux champs ma flâme à ma bergere,
Et des libres oyseaux la trouppe bocagere
Voulut estre témoin du noeud de mes amours.
L' astre qui dans le ciel precipite son cours,
Arresta pour m' oüir sa clarté passagere ;
Et zephire affligé de son humeur legere
Jura qu' à mon exemple il aimeroit tousjours.
N' apprehendez donc point que j' use de feintise,
Et que contre la foy que je vous ay promise,
Je prefere un autre astre à vos astres jumeaux ;
Si j' esteins, ô Cloris vostre feu qui m' anime,
Que l' echo, le soleil, le zephir, les oyseaux,
Me viennent reprocher ma foiblesse, ou mon crime.
Sujet: Guillaume Colletet (1598-1659) Les tesmoins d' amour. 
Dim 24 Juin - 12:17
