Guillaume Colletet (1598-1659) L' amour de la vertu.

L' amour de la vertu.


Sonnet 101.

Cloris, je ne veux plus vous aimer davantage,
Mon esprit est rebelle à vos commandemens ;
Si j' ay servy d' exemple aux fideles amans,
Je veux servir d' exemple à tout amant volage.

Autant que j' estois fol je veux devenir sage,
Et chercher loin de vous de vrays contentemens ;
Si je souffrois encor vos rudes traittemens,
J' aurois trop de constance, et trop peu de courage.

Comme vostre beauté me remplissoit d' ardeur,
Enfin pour mon repos vostre extréme froideur
A toute esteinte en moy cette premiere flâme ;

Je n' ay plus ces desirs dont j' estois combattu ;
Cloris si quelque amour se r' allume en mon ame,
Ce sera seulement l' amour de la vertu.