L' arrivée du Duc De B à Paris.
Sonnet.
Un grand duc delaissant le soin qui l' importune,
Et les cris dont sa voix troubloit la paix des morts,
Oppose à sa douleur qui dompte les plus forts
Sa vertu qui n' est pas une vertu commune.
En dépit de l' orage et l' ire de Neptune,
Dont il a constamment surmonté les efforts ;
Le voicy qui du Nort vient surgir à nos bords,
Où son merite esclatte autant que sa fortune.
Favory d' un grand roy, gloire de l' univers,
Voy-tu comme Paris t' attend à bras ouvers ?
Ta presence l' esleve au comble de sa joye.
Dans les ravissemens qu' il a de tes appas,
Il confesse desja que celuy qui t' envoye
Ne seroit point si grand, si tu ne l' estois pas.
Sujet: Guillaume Colletet (1598-1659) L' arrivée du Duc De B à Paris. 
Dim 24 Juin - 19:14
