Guillaume Colletet (1598-1659) Pour un italien.

Pour un italien.


J' estois arrivé dans ces lieux
Pour faire voir à ce grand prince,
Qu' un italien dance mieux
Que pas un de cette province.
Mais la verité m' a deceu ;
Enfin mes yeux ont apperceu
Que le vray françois quoy qu' il fasse
Tous les autres peuples surpasse.
Car dançant tantost en avant,
Puis aux costez, puis en arriere,
Il s' est emparé du devant,
Et m' a tousjours laissé derriere.