Guillaume Colletet (1598-1659) Hymnes du bien-heureux Jean De Dieu Hymne II.

Du bien-heureux Jean De Dieu.


Hymne II.

Apres qu' il eut par sa parole
Basty sa charitable escole
Sur de solides fondemens,
Ce sainct digne de mille temples
Confirma par ses bons exemples
Tous ses devots enseignemens.
C' est ainsi qu' un chrestien doit vivre,
C' est et la science et le livre
Qu' il doit pratiquer en tout lieu ;
Considerons ce que nous sommes ;
Nous devons nous prester aux hommes,
Mais enfin nous donner à Dieu.
C' estoient les aymables delices,
L' estude, et les seuls exercices
Où ce sainct trouvoit des appas ;
Donc que chacun de nous l' imite ;
Comme sa gloire est sans limite,
Nostre gloire n' en aura pas.
Grand saint, que la voute supresme
Environne d' un diadesme
D' eternelle felicité ;
Esteins toutes nos autres flâmes,
Et brusle nos coeurs et nos ames
Du saint feu de ta charité.
Fay qu' aux pauvres soient profitables
Ces exercices charitables
Que nous pratiquons devant tous ;
Que tes soins secondent les nostres,
Et comme nous aidons les autres,
Ô bien heureux sainct aide nous.
Par ta priere continuë
Fay que le nombre diminuë
Des malades qui sont icy ;
Rend leur la force et le courage,
Guery le mal qui les outrage,
Et nourris les pauvres aussi.
Au pecheur fay misericorde ;
Maintien les princes en concorde
Dans le throsne de leurs ayeux ;
Et confortant l' ame fidele
Marche sur la terre avec elle,
Et la fay reposer aux cieux.
Gloire en soit au pere supresme
Puis qu' il est la charité mesme ;
Honneur à son fils Jesus-Christ,
Vray Dieu de paix et de clemence,
D' amour, et de grandeur immense ;
Gloire eternelle au Saint Esprit.
Les pieux devoirs de la charité chrestienne,
Qui se pratiquent à Paris dans l' hospital
De la charité.